Krisi Ekonomikoa -

Funtzionarioak

Sindikatuek 'murriztutakoa itzultzea' eskatu diote Jaurlaritzari

ELAk, LABek eta UGTk ohartarazi dute mobilizazioak areagotu egingo dituztela.

AGENTZIAK | ERREDAKZIOA

Whatsapp Facebook Twitter Telegram Email

ELA, LAB eta UGT sindikatuek azken urteetan langile publikoei egindako "murrizketa guztiak itzultzeko" negoziazio "serioak" abiatzeko deia egin diote Eusko Jaurlaritzari. Horrenbestez, "zorra" aitortzea eta "murriztutako guztia" berreskuratzeko "egutegia" zehaztea eskatu dio.

Gainera, mobilizazioak "areagotzeko" asmoa dutela ohartarazi dute.

Astero bezala, hiru zentralek elkarretaratzeak egin dituzte gaur Jaurlaritzaren egoitzetan, eta "Zerbitzu publikoa garatu. Negoziazioa orain" izan dute leloa.

"Ezin dugu onartu langileei leporatzea krisia eta diru-bilketaren jaitsiera, ez baita gure ardura, inola ere ez", salatu du Javier Naveda ELAko ordezkariak, Bilbon egindako protestan.

Horren esanetan, murrizketak egitea Espainiako Administrazioak agintzen zuela izan da orain arte Jaurlaritzak jarritako aitzakia, "baina, orain, duela hainbat urte lapurtutako eskubideak itzultzen ari dira, eta, horrenbestez, Jaurlaritza beste hainbat aitzakia bilatzen ari da". Horren ildotik, murrizketak egiten ari den administrazio bakarra Gasteizko gobernua dela nabarmendu du.

Bestalde, Joseba Izaga LABeko ordezkariak txalotu egin du aldarrikapen honetan hiru sindikatuek bat egin izana, eta "galdutakoa" berreskuratzeko "negoziazio serioak" egitea eskatu dio Jaurlaritzari.

Azkenik, Pilar Oliva UGTko kideak salatu du EAEko langile publikoen egoera "jasangaitza" dela, eta "aspalditik" negoziazio "serioa" nahi dutela gaineratu du.

Hau zure interesekoa bada, baliteke beste gai hauek ere izatea
Ukraina-Errusia gerrak eragindako krisia Eusko Jaurlaritza albisteak Eusko Langileen Alkartasuna LAB Murrizketak gaur Euskal Autonomia Erkidegoa albisteak Lana Ekonomia Albisteak