Ekonomia -
Kutxak eta banku fundazioak
Eusko Jaurlaritzak Kutxen Legeari alegazioak jartzeko epea ireki du
Aurreproiektuak EAEra egokitu du Estatuko araudia, eta fundazioen Gizarte Ekintzarako betebeharrak zehazten ditu.
Erredakzioa
Eusko Jaurlaritzak Aurrezki Kutxen eta Banku Fundazioen Lege Aurreproiektuaren kontsulta publikorako eta alegazioak aurkezteko epea ireki du, Estatuko araudia EAEra egokitzeko, eta fundazioen izaera juridikoa arautzeko.
Azken batean, Ricardo Gatzagaetxebarriak Jaurlaritzaren gobernu-bileraren ostean azaldu duenez, Estatuan indarrean dagoen araudia EAEra ekartzeko prozedura abiatu dute.
Dokumentuak, hala ere, Espainiako Estatuan arautu gabe dauden ezaugarri batzuk zehazten ditu, Gizarte Ekintzaren alorrean bereziki.
Besteak beste, fundazioen dibidenduen % 90 Gizarte Ekintzara bideratu beharra dagoela zehazten du. Hala eta guztiz ere, lehenago aurrezki kutxei eragiten zien araudiaren zati bat da hori, hemendik aurrera banku fundazioei ezarriko zaiena.
Aurrezki kutxak egon daitezke
Gatzagaetxebarriak azaldu duenez, orain ez dago aurrezki kutxarik, baino etorkizunean egon daitezke, araudiak ahalbidetzen duelako.
Hala ere, etorkizuneko aurrezki kutxak desberdinak izango direla eta aurreproiektuan horien ezaugarriak arautzen direla jakinarazi du. Izan ere, kutxek ezingo dituzte 10.000 milioi eurotik gorako aktiboak izan, eta erkidego barruan edo ondokoetan soilik lan egin hala izango dute.
