CAF, Mexikoko kontratua ez galtzeko konponbide bila

CAF konpainia gipuzkoarrak azaldu duenez, "konponbide egokienak" bilatzen ari da Mexiko Hiriko metroan agertutako arazo teknikoak konpontzeko eta kontratu hori ez galtzeko.

Espainiako Balore Merkatuaren Batzorde Nazionalera (CNMV) igorritako txosten batean, "hainbat lantaldetan" parte hartzen ari dela zehaztu du enpresak, arazoak konpontzeko.

CAFek Mexiko Hiriko 12. lineako trenak hornitu zituen 2012an, eta hurrengo 15 urteetan mantentze-lanak egiteko kontratua ere sinatu zuen. Iaz, baina, trenen gurpilak ohi baino arinago higatzen direla egiaztatu zuten hiri horretako agintariek. Hori dela eta, kontratua haustea aztertzen ari direla publikatu dute bertako hedabideek.

Horren aurrean, higadura trenbidearen diseinuaren ondorio dela argudiatu du euskal konpainiak, eta trenek "nazioarteko estandarrak" betetzen dituztela nabarmendu du.

"Alde guztientzat egokia izango den konponbide bat lortuko dugu", aurreratu du.