Espainiako ekonomiarekiko konfiantza, maila altuenetik 2007tik

Espainiako ekonomiarekiko konfiantzak gora egin du urtarrilean, laugarren hilabetez jarraian, eta 2007ko martxotik izan duen mailarik altuenean dago. Hain zuzen ere, 105,6 puntutik 106,6 puntura igo da abendutik urtarrilera, Europako Batzordearen arabera.

Erakunde horren arabera, kontsumitzaileen, industriaren eta txikizkarien egoera hobetu delako egin du gora adierazleak.

Hain zuzen ere, kontsumitzaileen konfianza -7,1etik -1,5era igo da, txikizkariena 10etik 15era eta industriarena -5,8tik -4,5era.

Aitzitik, txarrera egin du eraikuntzaren sektorearekiko (-25,1etik -25,8ra) eta zerbitzuekiko (20,7tik 16,4ra) konfiantzak.

Europar Batasunean, konfiantza ekonomikoak gora egin du Italian (2,6 puntuko hazkundea) eta Alemanian (0,4), eta behera, Frantzian (-0,4) eta Herbehereetan (-1,2).

Euroguneko ekonomiarekiko konfiantza 101,2 puntura igo da (100,6koa izan zen abenduan), eta Europar Batasunekoarekikoa, aldiz, 104,6ra (104,1ekoa izan zen aurreko hilean).