Ekonomia -
Lan Gatazka
Osakidetzako sindikatuek beste mobilizazio kanpaina bat iragarri dute
CCOO, UGT, ELA, LAB, ESK, SATSE, SME eta FFHE sindikatuek hainbat lanuzte eta protesta-ekintza deitu dituzte. Apirilaren 29rako eta 30erako greba orokorra deitu dute Osakidetzako zentroetan.
Erredakzioa
Osakidetzako sindikatuek beste mobilizazio kanpaina bat iragarri dute datozen hilabeteetarako, "osasungintzan ematen ari diren murrizketak salatzeko". Baldin eta Osasun sailak euren eskariak kontuan hartzen ez baditu, protesta-ekintzei berrekingo dietela esan dute sindikatuek; sinadura-bilketak, manifestazioak, elkarretaratzeak eta lanuzteak iragarri dituzte. Besteak beste, apirilaren 29rako eta 30erako greba orokorra deitu dute Osakidetzako osasun-zentro guztietan.
CCOO, UGT, ELA, LAB, ESK, SATSE, SME eta FFHE Osakidetzako sindikatu denak bat eginda agertu dira goizean, Bilbon, komunikabideen aurrean. Iazko azaroan eta abenduan ere mobilizazioak egin zituzten, Osasun sailarekin adostasunik lortu gabe.
"Murrizketak bertan behera uztea" eta "Osakidetzako langileek azken urteotan galdu dituzten eskubideak" berreskuratzea aldarrikatzen dute sindikatuek. Besteak beste, Osasun sailarekin 3.000 plazako lan-eskaintza publikoa negoziatu nahi dute.
"Izan ditugun murrizketak kontuan hartuta, gure eskariak zentzuzkoak dira. Osakidetzako zuzendaritzak bere jarrera malgutzen ez badu, Osasun publikoaren aldeko apusturik ez duela egin nahi erakusten du", esan du Arantza Agote UGTko ordezkariak.
Osakidetzak pasa den astean kaleratu zuen agirian zehaztu zuenez, otsaileko bileran "funtsezko hainbat alorretan" proposamenak egingo ditu Osasun sailak. Langileen barne-mugikortasuna, leku-aldaketak, behin behineko kontratazioa eta lan eskaintza publikoa dira bi aldeen arteko gatazkaren gakoak.
