77 milioi euroko irabaziak izan zituen Oronak 2014an

Oronako bazkideek urteroko batzarra egin dute ostiral honetan Orona Ideo egoitzan (Hernani) eta 2014ko kontuak onartu dituzte. Kooperatibak 77 milioi euroko irabaziak eta 578 milioi euroko salmentak izan zituen iaz, hurrenez hurren, 2013an baino 6 milioi eta 15 milioi gutxiago.

Kooperatibak 4.333 langilerekin itxi zuen urtea. Bestalde, 38 milioi euro bideratu zituen inbertsiora eta salmenten % 2a berrikuntza alorrari lotutakoa izan zen.

Xabier Mutuberria Oronako zuzendari orokorrak azaldu duenez, kooperatibaren emaitza horien atzean daude Oronak hainbat merkatu-hobitan izandako posizio hobekuntza -produktuen alorrean zein bezeroei eskainitako arreta zerbitzuan- eta kostuetan egindako kudeaketa eraginkorra.

"Konplexutasunez beteriko eszenatoki aldakor eta anitza kudeatzeko gai izan gara. Kolektiboaren ahaleginari esker urte ona burutzea lortu dugu", azpimarratu du Mutuberriak. Horren esanetan, "kooperatibak duen profil internazional eta europarra indartu egin da, Oronak Polonian lortu duen posizioari esker".

Ildo horretan, 2015-18 aldiko enpresa proiektua aurkeztu du Oronak taldeak egindako prozesu baten ondotik. "Oronak indarrez begiratzen dio Europari" eta datozen lau urteetan salmentak handitzea espero du 750 milioi euroko irabaziak izan arte.