Ekonomia -
Turismoa
Turisten kopurua % 8,7 igo da Bilbon
Lehen aldiz, udan atzerriko turista gehiago egon dira, Estatukoak baino. Bizkaiko hiriburuarentzat inoizko daturik onenak izan dira aurtengoak.
Agentziak | Erredakzioa
Bilbok 249.604 turista jaso ditu uda honetan (2014an baino % 8,7 gehiago), eta turista atzerritarren kopurua % 10,6 igo da. Gehienak, Frantziatik, Erresuma Batutik, AEBtik eta Italiatik etorri dira.
Halaber, Espainiatik etorritako turista gehienak madrildarrak, katalanak eta andaluziarrak izan dira.
Gaua igarotzeko asmoz etorri diren turisten kopuruak ere gora egin du; hain zuzen, % 8,8 egin du gora, aurreko urteko datuekin alderatuta. Batez beste, bi egun eman dituzte bertan.
Mercedes Rodriguez Bilboko Turismo zuzendariaren esanetan, “datu positiboak” dira, eta Bizkaiko hiriburua aisialdirako helburu bezala finkatzen ari dela erakusten dute.
Turista gehiago erakartzeko asmoz, nazioarteko ekitaldi eta azoketan ere aurkeztuko dute Bilbo datozen hilabeteotan.