Garen aurkeztu dute, euskal enpresen elkarte berria

Garen deituriko euskal enpresaburuen elkartea publikoki aurkeztu dute gaur Donostian. Batez ere enpresa txikiei dago zuzenduta, eta elkartearen bultzatzaileek adierazi dutenez, "mugimendu parte-hartzaile bat da, inoren kontra jaio ez dena".

Garen elkarteko presidente eta presidenteorde Iñaki Zuloaga eta Jesús Gómez Montoya arduratu dira proiektua aurkezteaz. Haien aburuz, "erabat hierarkizatuta eta lurraldekatuta dauden azpiegitura erraldoi astunetatik" aldenduta, erakunde berriak organizazio askoz sinpleagoa proposatzen du, hiru lurraldeetan batera jardutea, eta, batez ere, bertako kideen "benetako parte-hartzea".

Zuloagak adierazi duenez, euskal enpresen sistema asoziatiboak dituen arazo guztiei heltzeko bokazioarekin jaio da Garen, "eredu desberdin, moderno eta berritzaile bat eskaintzeko", askoz merkeagoak izango diren kuotak izango dituena (urtean 180 euro), "nahiz eta euskal patronal guztien arteko zerbitzuen katalogo zabalena daukan".

Gogoratu du eraikitzen ari den mugimendu hori enpresaburu batzuen artean egindako gogoetatik sortu zela, enpresek esparru asoziatiboan apenas parte hartzen zutela arduratu baitzeuden (% 10 besterik ez).

Garenek "enpresaburu txikiei begiratu nahi die" batez ere, Euskal Autonomia Erkidegoko enpresen % 85 direnak.

Parte-hartze aktiboa, aniztasuna, akonpainamendua eta funtzionamendu independentea daude plataforma berri horren oinarrian. Bestalde, bere bultzatzaileek argi utzi nahi izan dute erakundea ez dela “ezkutuan” sustatu eta ez datorrela inoren aurka egiteko.

Orain arte, ehun bat enpresak egin dute bat Garen elkartearekin, batez ere gipuzkoarrak. Bere helburu nagusien artean negoziazio kolektiboa eta elkarrizketa soziala daude, besteak beste, eta, instituzioekin solaskide izateko asmoa dauka.