20.397 langabe gutxiago zeuden Hego Euskal Herrian, 2015 amaieran

2015. urtearen amaieran 20.397 langabe gutxiago zeuden Hego Euskal Herrian, Espainiako Gobernuaren Lan eta Gizarte Segurantza Ministerioak gaur emandako datuen arabera.

Euskal Autonomia Erkidegoan 150.017 pertsona zeuden lanik gabe urte amaieran, 2014 urtearen bukaeran baino 15.754 gutxiago (% 9,50). Azaroako datuekin alderatuta, berriz, 1.848 behargin gutxiago zeuden langabezian abendu amaieran (- % 1,22).

EAEko probintziei dagokionez, berriz, Gipuzkoan jaitsi da gehien urte arteko langabezia (- % 10,15), Arabaren (- % 9,43) eta Bizkaiaren (- % 9,20) aurretik. Zenbaki absolutuetan, ostera, Gipuzkoan 4.672 langabe gutxiago zeuden 2015 urtearen amaieran, 2.540 gutxiago, Araban; eta 8.542 gutxiago Bizkaian.

Nafarroako Foru Erkidegoan, berriz, langabeziak gora egin zuen abenduan eta 43.143 langabe zeuden urte amaieran. Azaroako datuekin alderatuta, 1.197 pertsona gehiago zeuden langabezian abendu amaieran (+ %2,85). Hala ere, azken urtebetean, 2014ko abendutik 2015eko abendura, langabezia % 9,72 jaitsi da Nafarroan (4.643 pertsona), krisia hasiz geroztik izandako urte arteko jaitsierarik handiena.

Bestalde, Estatu espainiarrean 4.093.508 langabe zeuden erregistratuta urte amaieran, 2014ko abenduan baino 354.203 pertsona gutxiago. 2015eko abenduan 55.790 lagun atera dira langabeziaren zerrendatik.