Ekonomia -
Hipotekak
Bankiak prozedura azkarra iragarri du zoru klausulak itzultzeko
Hipoteka Bankiarekin sinatu zutenek finantza erakundearen bulego batera joan beharko dute zoru klausulengatik ordaindutako gehiegizko dirua itzultzea eskatzeko.
AGENTZIAK | ERREDAKZIOA
Bankiarekin zoru klausula duen hipoteka sinatu zuten kaltetuek ordaindutako gehiegizko dirua itzultzea eskatu ahal izango dute (interesak barne), Bankiak gaur iragarri duen prozedura azkar bati esker.
Finantza erakundeak ohar bidez jakinarazi duenez, bezeroek Bankiaren bulego batera joan eta zoru klausulengatik ordaindutako gehiegizko dirua itzultzea eskatu beharko dute, eskari bat beteta.
Bankuak kaltetua identifikatutakoan, zoru klausulengatik ordaindutako gehiegizko dirua itzultzea eskainiko dio (interesak barne). Bankiaren esanetan, bezeroek aldeko epai batekin eskuratuko luketen kantitate bera jasoko dute, kostuak eta denbora aurreztuz.
Bankiak bi aukera emango dizkie kaltetuei: dirua beren kontu korrontean itzultzea edota hipoteka amortizatzea.
Bankiak mezu bat igorriko die bezeroei prozesuaren berri emateko, eta otsailaren 3tik aurrera prozedura horri buruzko informazio guztia Bankiaren webgunean egongo da eskuragarri.
