Ekonomia -
Estimazioa
20.000 pertsona baino gehiago kaltetu ditu Popularraren salmentak Euskadin
Akziodunak eta bonuen edukitzaileak dira kaltedunak. Popularrak 60 bulego baino gehiago ditu Euskadin eta, horietan, 350 langile inguruk egiten dute lan.
agentziak | erredakzioa
Popular banketxearen salmentak 20.000 pertsona kaltetu ditu Euskadin, LEAN Abogados bulegoak eskainitako lehen estimazio baten arabera. Akziodunak eta bonuen edukitzaileak dira, eta horietako batzuk hasi dira biltzen euren "eskubidea defendatzeko" eta epaitegietarako jotzeko aukera aztertzeko.
Popularrak 60 bulego baino gehiago eta 350 langile ditu Euskal Autonomia Erkidegoan (EAE).
Abokatuen bulego honek egindako kalkuluen arabera, 20.000 dira kaltedunak, gehienak akziodun edo inbertsore txikiak. Inbertsioa 190 milioi euro ingurukoa ei da.
Santanderrek euro baten truke erosi zuen atzo Popular. Salmentarekin, Popular banketxeko akzioek "balio guztia galdu dute, armotizatuta geratu baitira", azaldu dute LEAN Abogados taldekoek. "300.000 akziodunek egindako inbertsioa galdu dute, eta gauza bera pasatu zaie 2013 eta 2015 urteen artean jaulkitako bonu bihurgarri kontingenteen jabeei (1.250 milioi euroko balioa), akzio bihurtzen ziren eta". Menpeko Zorraren (684 milioi) jabeek ere inbertsioa galdu dute.
Abokatu bulego honen arabera, inbertsore gehienek ez dute dirutza berreskuratuko, baina "kasu batzuetan helegitea aurkeztu ahalko da". 2016ko maiatzean egindako kapital handitzean (2.5000 milioi euro) akzioak erosi zituzten pertsonek aukeraren bat izan lezakete, LEAN taldeko adituen esanetan.
