Ekonomia -
LAN GATAZKA
Siemens Gamesak ELA, CCOO eta UGTrekin lorturiko akordioa salatu du LABek
LABek azaldu duenez, Siemens Gamesak otsailaren 5ean aurkeztuko du 235 langile kaleratzeko lan erregulazioko espedientea. Halaber, Miranda de Ebron duen lantegia itxiko du.
AGENTZIAK | ERREDAKZIOA
Siemens Gamesako lan gatazkan, lanpostuen alde borroka egiteari uztea leporatu die LAB sindikatuak UGT, CCOO eta ELAri. Ohar batean LABek baieztatu duenez, zuzendaritzak otsailaren 5ean aurkeztuko du estatu espainiarrean 235 langile kaleratzeko lan erregulazioko espedientea, "UGT, CCOO eta ELArekin lortuko akordioari esker". Horrez gain, enpresak Miranda de Ebron duen lantegia ixteko asmoa iragarri du.
Guztira, 400 bat lanpostu kolokan daudela salatu du LABek.
LABen esanetan, Siemens Gamesak enplegua suntsitzen eta lan baldintzen kontrako erasoak egiten jarraituko duela erakusten du. Egoera horren aurrean, bide posible bakarra enplegua defendatzea eta plan industriala aurkeztea dela nabarmendu du. "Horrek bakarrik eramango du enpresa bere estrategia birpentsatzera", gaineratu du.
UGT, CCOO eta ELA sindikatuek lanpostuen defentsa egiteari uko egin diotela uste du LABek. Ildo horretan, enplegua defendatzeko eskatu die hiru sindikatuei.