Ekonomia -
Enplegu zerbitzua
ELA, LAB, CCOO eta UGT sindikatuek greba deitu dute Lanbiden, maiatzak 10erako
Erakundeek arretarako eredu berriaren aplikazioa bertan behera utzi eta "benetako negoziazio prozesua" abiaraztea eskatu dute. Apirilak 27an bilkurak egingo dituzte lan zentroetan.
agentziak | erredakzioa
ELA, LAB, CCOO eta UGT sindikatuek greba deitu dute Lanbide Euskal Enplegu Zerbitzuan maiatzak 10erako, arreta eredu berriaren aplikazioaren aurka. Erakundeek arretarako eredu berriaren aplikazioa bertan behera utzi eta "benetako negoziazio prozesua" abiaraztea eskatu dute.
Elkarrekin zabaldutako ohar batean, lau sindikatuek Lanbideko bulegoetan "ezarri nahi den" arreta-eredu berriarekiko "desadostasuna" adierazi dute. " Zuzendaritza alde bakar batetik ematen ari da pausoak, erakunde horretako langileen oinarrizko eskubideak urratuz".
" Eredu berria abiaraziko dute langile gehienen iritziaren aurka, sindikatu bakar baten sostengurik gabe, eta herritarrentzako zerbitzuaren kalitatearen kaltetan", salatu dute.
Hala, "lau sindikatuok arreta-eredu berriaren ezarpena geldiarazteko eskatu dugu, baita Lanbiderako beste eredu bat prestatzeko ere, bete behar diren eginkizunekin bat etorri behar duena, enpleguaren politika aktiboak alde batera utzi gabe".
Hori dela eta, "sindikatuok joan den asteazkenean, hilak 18, hiru lurraldeetan egindako batzarretako sostengu zabalarekin, lantokietan elkarretaratzeak egitera deitu dugu (apirilak 27), eta maiatzaren 10erako greba-deialdia erregistratu dugu".