Gizartea -

Euskararen Eguna

1.800 webgune gehiago .eus dira jada

2014ko udaberritik milatik gora elkartek, enpresak eta erakunde publikok, tartean eitb.eus-ek, egin dute domeinu aldaketa. Gaurtik aurrera publiko orokorrak egin ahalko du erregistroa.

Josu Waliño et Lorea Arakistain (Puntueus), lehendakaria eta Sustrai Colina bertsolaria ekitaldian.
1.000 webgunetik gora daude jada .eus domeinuarekin

1:22

E.G. | eitb.eus

Whatsapp Facebook Twitter Telegram Email

1.813 webgunek .eus deitura dute dagoeneko, eta erdietsitako marka ospatzeko ekitaldia egin du gaur, Euskararen Naziarteko Eguna den honetan, Puntueus Fundazioak EiTBko egoitzan, Iñigo Urkullu lehendakaria bertan zela. Lehen fase honetan, enpresek, elkarteek eta erakunde publikoek aldatu dute domeinua, eta abenduaren 3 honetatik aurrera, nahi duen orok egin ahalko du erregistroa.

Agerraldian Josu Waliño Puntueus Fundazioko zuzendari nagusiak azaldu duenez, 1.292 domeinu-izen erregistratu dira 2014ko udaberritik; % 95, Euskal Herrikoak, eta % 5, atzerrikoak. Izan ere, "PuntuEUS domeinua euskara eta euskal kulturaren komunitatea da, guztiona, muga geografikorik gabekoa". Ekitaldiaren ostean, baina, Waliñok Twitter bidez jakinarazi du jada 1.813 direla .eus domeinura pasatutako webguneak.

Orain arte .com edo .net deitura zuten eta orain .eus duten enpresa, hedabide eta erakunde publikoetako webguneen artean, mota eta alor askotakoak daude: euskarari lotutakoak, hezkuntza mundukoak, norbanakoak? EiTBko webgunea da .eus-erako jauzia egin duenetako bat, arazoaren 25etik baita eitb.eus.

Helburua urtea amaitu aurretik 2.000 webgune .eus domeinuarekin erregistratzea dela esan du Puntueus Fundazioko zuzendariak. Izan ere, abenduaren 3 honetatik aurrera, nahi duen orok egin ahalko du erregistroa Fundazioaren atarian. Automatikoki esleituko dira izena, gainerako domeinuekin egiten den bezala. .eus deitura izateko, baina, bi baldintza bete beharko ditu eskatzaileak: batetik, webgunearen zati bat euskaraz izan beharko da, eta, bestetik, euskarazko edukirik ez dagoen kasuetan, euskal kulturarekin loturiko edukiak izan beharko ditu. Domeinua eskuratzeko ordaindu beharrekoari dagokionez, prezioa erregistratzaileek jartzen dutela esan dute Fundazioko arduradunek, baina publiko orokorrari zabaldutako fase honetan aurrekoan baino merkeago izango direla aurreikusi dute.

Hain justu, Durangoko Azokari begira, erregistroa bultzatzeko promozio berezia eskainiko du Fundazioak. Norbanakoek bere izen edo abizena .eus domeinupean erregistratzeko aukera izango dute erdi-prezioan. Hala, 30 euroren truke, domeinu-izena, posta elektronikoko 20 kontu, 2 GB-eko espazioa eta transferentzia ahalmen mugagabea erosteko aukera izango da abenduaren 6an, 7an eta 8an Durangoko Azokan Puntueus Fundazioak izango duen standean.

Hau zure interesekoa bada, baliteke beste gai hauek ere izatea
Euskaraz Euskara eguna gaur