Inputatuta, gizon bati mehatxuak egiteko hiru lagun kontratatzeagatik

Ertzaintzak hiru pertsona atxilotu ditu Getxoko bizilagun bati mehatxuak egitea eta bortxa delitua egotzita, eta laugarren pertsona bat (Valladolideko bizilaguna) inputatu du eraso hori egiteko hiru gizonak kontratatzeagatik.

Antza denez, hiru gizonak kontratatu zituen Valladolideko bizilaguna eta Getxoko bizilaguna auzibidean daude, Eusko Jaurlaritzako Segurtasun Sailak berri eman duenez.

Astelehenean egin zituzten atxiloketak Algortan; zerbitzuz kanpo zegoen ertzain batek hiru susmagarri Seat Ibiza batean barruan ikusi zituen eta abisua eman zuen.

Aipaturiko ibilgailua Valladoliden alokatutako ibilgailua zen eta aurreko egunean itzuli beharra zeukaten. Horregatik, hasiera batean, ibilgailua lapurtzea egotzita atxilotu zituzten.

Ondoren, auto barruan, Getxoko bikote baten helbidea aurkitu zuten eta horiekin harremanetan jarri zirenean, ertzainei adierazi zieten Valladolideko bizilagun batekin auzibidean zeudela eta hainbat alditan mehatxuak jaso zituztela.

21, 24 eta 27 urteko atxilotuak atzo arratsaldean epailearen esku utzi zituzten.