Hil egin da droga kontu batengatik Bilbon sastatu zuten gizona

Astearte gauean Bilbon sastatu ostean Gurutzetako ospitalera eraman zuten 36 urteko jatorri ginearreko gizona hil egin da gaur goizean, Ertzaintzak jakitera eman duenez.

Dirudienez, droga kontuengatik gertatu zen erasoa, hildakoak ustez erasotzaileei saldu zien drogaren kalitate eskasagatik hain zuzen ere. Ustezko erasotzaileak, gizonezko bat eta emakume bat, lekuan bertan atxilotu zituzten.

Astearte gauerdia aldera izan zen erasoa, Bizkaiko probintzia auzitegia zaintzen ari ziren ertzainengandik gertu.

Hildako gizonari ebakuntza egin zioten ospitalean, eta ustez kokaina zen dosiak atzeman zizkioten sabelean.

Bi atxilotuak, 39 urteko gizona eta 38 urteko emakumea, aurrekariak dituztenak, epailearen esku utzi dituzte. 39 urteko gizona Basauriko espetxera bidali du epaileak. 38 urteko emakumea, ostera, libre karguekin utzi du magistratuak.