Haurdunek kukurruku eztularen aurkako txertoa jaso dezakete dagoeneko

Haurdunaldiaren azken hiruhilekoan dauden emakumeek kukurruku eztularen aurkako txertoa jaso ahalko dute gaurtik Osakidetzan. EAEko osasun zerbitzu publikoak aurten gaineratu du txerto egutegiaren barruan, arlo horretako kontseilu aholkulariak proposatuta.

Eusko Jaurlaritzatik azaldu dutenez, haurdunaldiaren 27. eta 36. asteen artean dauden emakumeek jarri ahalko dute txertoa. Jaioberriak babestea da helburua, txerto estaldura handia duten herrialdeetan gero eta kukurruku eztul kasu gehiago atzematen ari baitira.

2011 urtetik, gaixotasun horren hedapena zabaldu egin da Euskadin. 2012an, adibidez, 16 kasu atzeman zituzten 100.000 biztanleko, jaioberriak gehienbat. Horregatik, haurdun dauden emakumeei txertoa jartzea aholkatu du Jaurlaritzak, eta txerto hori haurdunaldian ere "segurua" dela azpimarratu du.

Umeei 4., 6. eta 18. hilabeteetan jartzen zaie kukurruku eztularen aurkako txertoa, eta 6 urte betetzean ematen diete azken dosia.

Orain, haurdunei ere jarriz, jaioberriei "babes handiagoa" eman nahi diete. Horren ildotik, txertoak jartzea "gaixotasunak prebenitzeko modu eraginkorrena eta seguruena" dela nabarmendu du Osasun Sailak.

Osakidetzaren esanetan, EAEko txerto-estaldura Europako onenetakoa da, % 95ekoa baita.