Gizartea -
Elkarretaratzea deitu dute
Eraso arrazista bat salatu dute Gasteizen
Hain zuzen ere, Boulevard merkataritza-guneko segurtasun agenteek Mauritaniako gizon bati eraso diotela salatu dute.
Erredakzioa
Hainbat elkartek, alderdi politikok eta sindikatuk elkarretaratzea deitu dute asteazkenerako Gasteizen, eraso arrazista bat salatzeko.
Horien arabera, erasoa Boulevard merkataritza-guneko segurtasun agenteek egin zioten Mauritaniako gizonezko bati, abenduaren 31n. Biktimak 10 urte daramatza Arabako hiriburuan.
Elkarteok salatu dutenez, gizonezkoari "eraso fisikoa" egin zioten, eta "irainak" egin zizkioten.
Elkarretaratzea Posta plazan egingo dute, 19:00etan, eta, besteak beste, honakoek deitu dute: Harresiak Apurtuz, Arrazismoari STOP, KIRA, Bachue, Salhaketa Araba, BATERA, Sare Antifaxista, Gazte Abertzaleak, Langabeen Biltzarra, CEAR Euskadi, Gora Gasteiz, ESK, CCOO, Aralar eta Alternatiba.