Gazte bat inputatu dute, finalean bonba bat jarriko zuela esateagatik

Espainiako Poliziak 17 urteko mutil bat inputatu du Murtzian, Kopako finalean Camp Noun atentatua egingo duela esan omen baitzuen Twitterren. Athletic eta Bartzelona neurtuko dira partida horretan, maiatzaren 30ean.

Antza denez, gazteak hainbat txio idatzi ditu Kopako finalari buruz, eta, horietako batean, bonba bat prestatzen ari zela eta aipatuko partidan "jaurtiko" duela esan zuen.

Twitterren bertan, hainbat pertsonak Polizia ohartarazi zuten.

Hasiera batean, eta bere txioek izan zuten oihartzuna ikusita, gazteak jarrera bortitza agertu zuen eta irainka hasi zen esandakoa ezabatzea eskatu ziotenen aurka. Azkenean, profila ezabatu zuen, Poliziak identifikatzea galarazteko.

Hala ere, agenteek identifikatu, eta atxilotu egin dute, Molina de Segura herrian (Murtzia). Mehatxu larriak egitea inputatu diote.