Gizartea -
Immigrazioa
Haur bat Ceutan sartzen ahalegindu da, maleta barruan sartuta
Aduanako eskanerrak antzeman zuen 8 urteko mutikoa. Ceutako Adin Txikikoen Sailaren esku gelditu da Boli Kostako haurra, eta maleta zeraman emakumea eta mutikoaren aita atxilotu egin dituzte.
AGENTZIAK | ERREDAKZIOA
Boli Kostako 8 urteko mutiko bat Ceutan sartzen ahalegindu zen atzo, maleta batean sartuta. Alabaina, saiakera ustela izan zen, aduanako eskanerrak antzeman egin zuen-eta.
Guardia Zibilak ohar batean jakinarazi duenez, 12:00etan antzeman zuten mutikoa El Tarajeleko aduanan. Guardia zibilek susmo txarra hartu zioten maleta bat zeraman emakume bati eta objektua eskanerretik pasatzeko eskatu zioten. Orduan, maletaren barruan pertsona bat zegoela konturatu ziren.
Maleta irekitakoan, Abou izeneko Boli Kostako haur bat atera zen bertatik. Ondoren, mediku arreta jaso behar izan zuen.
Argazkia: EFE
Jarraian, maleta zeraman 19 urteko emakume marokoarra atxilotu zuten.
Bestalde, 13:30ak aldera, haurraren aita atxilotu zuten aduanan bertan. Espainian bizitzeko baimena du eta, guardia zibilekin hitz egin ostean, haurraren aita zela onartu zuen.
Bien bitartean, Ceutako Adin Txikikoen Sailaren esku gelditu da haurra.