Gizartea -
Trafikoa
Auto gidari bat hil da Berrizen, AP-8an ibilgailua iraulita
Berriz parean izan da istripua, 07:40 inguruan, Bilboko noranzkoan. Ibilgailua irauli egin da, eta gidaria barruan harrapatuta geratu da.
AGENTZIAK | ERREDAKZIOA
Pertsona bat hil da gaur goizean AP-8 autobidean, Berriz parean izan den zirkulazio-istripuan, Eusko Jaurlaritzako Segurtasun Sailak jakitera eman duenez.
07:40 inguruan izan da ezbeharra, Bilboko noranzkoan. Ibilgailua irauli egin da, eta gidaria barruan harrapatuta geratu da.
Suhiltzaileak eta bi anbulantzia joan dira istripua izan den tokira, eta osasun langileak gidaria suspertzen saiatu dira, baina hil egin da.
Ezbeharraren ondorioz, auto-ilarak sortu dira AP-8an, Berriz parean.
Ertzaintzak ikerketa zabaldu du, autoa zer dela eta irauli den argitzeko.
