Kamioi baten istripuak A-8 autobidea ixtea eragin du, Trapagaranen

A-8 autobidea lau orduz itxita egon da Trapagaran parean, Kantabriako noranzkoan. Kamioi batek guraizearena egin du, eta errepidean gurutzatuta geratu da.

Eusko Jaurlaritzako Segurtasun Sailak jakitera eman duenez, 12:40 inguruan izan da istripua, eta ondorioz, auto ilara luzeak izan dira, bi kilometrotik gorakoak. Portugaleteko irteeratik bideratu du trafikoa Ertzaintzak.

Errepidea 16:45ean ireki dute eta egoera bere onera etorri da.

Istripuan ez da inor zauritu.