Gizartea -
Trafikoa
Motor-gidari bat hil da Bilbon, kamioi baten kontra talka eginda
Barakaldoko 38 urteko gizasemea da zendutakoa. Motorrak eta kamioak aurrez aurre egin dute talka.
EITB.EUS
Motor-gidari bat, 38 urteko barakaldarra, hil da gaur eguerdian Bilbon, haren motorrak eta lorezaintzako udal kamioi batek talka eginda, Bilboko Udaltzaingoak eitb.eus-i jakinarazi dionez.
Ezbeharra 12:00ak aldera jazo da Montevideo etorbidean, Zorrotzarako bidean. Oraindik argitu gabeko arrazoiak tarteko, motorrak eta kamioiak aurrez aurre egin dute talka. Motorraren gidaria bertan hil da.
Bidea garbitzeko lanek iraun duten artean, errepidea itxi du Bilboko Udaltzaingoak. 13:45ean zabaldu dute berriro.