Eraikin bat hustu dute Donostian, sute baten ondorioz

Sutea izan da, goizean, Donostiako zeramika-denda batean. Ondorioz, lau solairuko eraikin bat hustu dute, badaezpada. Bi bizilagun Donostia Ospitalera eraman dituzte, kea arnastuta.

Donostiako Suhiltzaileek jakitera eman dutenez, 07:00etan piztu da sua, Eskalantegi kaleko lokal batean. Berez, kale hori Donostiakoa den arren, Pasai Antxoko barrutian dago kokatuta.

Lehen informazioen arabera,  zeramika-dendako biltegian zegoen kaxa edo panel elektrikoan piztu da sua; bertan pilatuta zegoen materialak berehala hartu du su, eta ke-laino handia zabaldu da eraikin osoan.

Donostiako Udaltzaingoa, Ertzaintza eta suhiltzaileak bertaratu dira. 08:00etarako amatatuta zegoen, eta bizilagunak euren etxeetara itzuli ahal izan dira.