Gizartea -
Onik atera dira
Tuterako 50 ikasle zeramatzan autobus bat, elurretan harrapatuta
Ikasleak, bost monitorerekin batera, Izabarantz zihoazen bart NA-2000 errepidetik. Suhiltzaileen eta Izabako bizilagunen ibilgailuekin etxera eraman zituzten.
Agentziak | Erredakzioa
50 eskola-ume eta bost monitore Izabara zeramatzan autobus bat elurretan harrapatuta geratu zen bart, Izaba eta Zuriza lotzen dituen errepidean. Haur guztiak onik atera dira.
Nafarroako Gobernuak agiri batean azaldu duenez, gertakaria bart jazo zen. Tuterako eskola bateko 50 ikasle zeramatzan autobusa elurretan harrapaturik geratu zen NA-2000 errepideko 5. kilometroan. Suhiltzaileen eta Izabako bizilagunen ibilgailuekin etxera eraman zituzten.
Ikasleak Izabara zihoazen, eski kanpainako jarduerekin gaur hasteko.
Elurrak kentzeko makinak ezin izan zuen lagundu
20:10 aldera Nafarroako larrialdi zerbitzuari abisua eman zioten. Elurra kentzeko makina bat bidali zuten, baina ezin izan zen autobusa zegoen tokira gerturatu.
Nabaskozeko eta Izabako suhiltzaileak bertaratu ziren. Lur orotarako ibilgailuak eraman eta adingabeak ateratzen hasi ziren.
Izabako bizilagunek operazioarekin bat egin zuten, eta ibilgailu partikularrekin eskola-umeak atera zituzten. Foruzaingoak ere erreskatean lagundu zuen.