Montserrati eta Trianari 22 eta 20 urteko zigorrak ezarri dizkiete

Montserrat Gonzalezi eta haren alabari, Trianari, 22 eta 20 urteko espetxe-zigorrak ezarri dizkiete, hurrenez hurren, Isabel Carrasco Leongo Diputazioko presidentea hiltzeagatik. Bitartean, Raquel Gago delitu horrengatik absolbitu dute, baina krimena estaltzeagatik eta armak legez kanpo izateagatik bost urteko kartzela-zigorra ezarri diote.

Montserrat Gonzalezek Isabel Carrascori tiro egin ziola aitortu zuen epaiketan. Bera eta Triana alaba zigortu ditu epaitegiak hilketa delitu batengatik.

Herri epaimahaiaren epaiaren arabera, Raquel Gago udaltzainak ez zuen krimenean lagundu, baina estaltzen saiatu zen. Ondorioz, hiru urteko zigorra ezarri dio. Hala ere, zortzi hilabete kendu behar zaizkio zigor horri, Gagok aurreneurrizko espetxean eman zituelako. Bestalde, armak legez kanpo izateagatik bi urteko kartzela-zigorra ezarri diote.

Defentsek errekurritu egingo dute

Montserrat Gonzalezen eta Triana Martinezen abokatuak, Jose Ramon Garcia Garciak, bere babespekoak kondenatzen duen epaia errekurrituko duela jakinarazi du.

Bestalde, Montserrat Gonzalezen eta Triana Martinezen defentsari laguntza ematen dion prokuradorea, Angel Diez Cano, Leongo Probintzia Auzitegira bertaratu da gaur, epaia jasotzera. Ez du adierazpenik egin nahi izan epaia sakontasunez aztertu arte, baina errekurtsoa jarriko dutela baieztatu du.

Aldi berean, gogora ekarri behar da auzi horretan auzipetuta dagoen hirugarren akusatuaren (Raquel Gago) abokatuak epaiketaren azken egunean adierazi zuela errekurritzeko asmoa izango zutela, Gagori "egun bateko kartzela-zigorra ezarriz gero".