Gizartea -
Kantabrian
Bilbotar bat hil da Guriezon izandako auto istripu batean
Hildakoa gidariaren ondoko eserlekuan zihoan istripua izan denean. Gidaria hildako gizonaren anaia da, eta zauri larriak jaso ditu.
Agentziak | Erredakzioa
44 urteko bilbotar bat hil da Guriezon (Kantabria) izandako auto istripu batean. Hildakoa gidariaren ondoko eserlekuan zihoan ibilgailua irauli denean. Gidaria hildako gizonaren anaia da, eta zauri larriak jaso ditu.
Rioseco auzoan bizi den gizon batek etxetik ikusi du Guriezon izandako auto istripua, eta Kantabriako larrialdi zerbitzuetara deitu du, 01:00etan. Istripuaren berri izan bezain pronto, suhiltzaileak, DYAko bi anbulantzia, Guardia Zibila eta larrialdi zerbitzuetako kideak bertaratu dira.
Suhiltzaileek ordu erdi behar izan dute ibilgailu barruan harrapatuta geratu diren bi anaiak ateratzeko, baina 44 urteko bilbotarra hilik atera dute. Besteak zauri larriak jaso ditu, eta Laredoko ospitalera eraman dute.