Azpeitiko Lapatx zabortegia itxi dute

Azpeitian dagoen Lapatx zabortegiak gaur, 2016ko azaroaren 30a, itxi ditu ateak behin betiko. Lapatxekoa da Gipuzkoan irekita zegoen zabortegi publiko bakarra, Zarautz eta Beasain udalerrietakoak itxi ostean.

Gainezka dago zabortegia, eta aspalditik itxita egon behar zuen, baina gaur izan du azken eguna irekita.

Mankomunitateak otsailean iragarri zuen zabortegia ez handitzeko erabakia hartu zuela, baina bete arte martxan jarraitzea onartu zuen. Hiruzpalau hilabetetan betetzea aurreikusi zuten, baina zabortegia ixteko data luzatzen joan da, Gipuzkoako Foru Aldundia zaborraren zati bat Meruelora (Kantabria) bideratzen hasi baitzen.

Hemendik aurrera, eta erraustegia egin arte (2020an hasiko da martxan, aurreikuspenen arabera), zaborra Meruelora bidaltzen jarraituko dute, eta baita Tuterara (Nafarroa) ere, otsailetik aurrera.