Gizartea -
LHkoak, 2018an
Haur eta Lehen Hezkuntzetako irakasleentzako lan eskaintza, 2017an
Sindikatuek lan eskaintza publikoa atzeratzea eskatu eta gero, Hezkuntza Sailak Haur Hezkuntzako eta Lehen Hezkuntzako 800 lanpostu eskainiko ditu 2017an, eta Lanbide Heziketakoak 2018an izango dira
Agentziak | Erredakzioa
Eusko Jaurlaritzako Hezkuntza Sailak Haur Hezkuntzako eta Lehen Hezkuntzako irakasleentzako 800 lanpostuko lan eskaintza publikoa egingo du, eta 2018rako utziko du Lanbide Heziketako irakasleentzako eskaintza.
Joan den ostiralean, Cristina Uriarte sailburuak ekainean 818 lanpostuko eskaintza deituko zutela iragarri zien sindikatuei. Lanpostu horietako 47 aurtengo deialdian eskaini baina hutsik gelditu ziren plazak dira.
Steilas eta LAB sindikatuek deialdia urtebete atzeratzea eta 2017ko eta 2018ko lanpostuak batera eskaintzea proposatu zuten, hautagaiek probak prestatzeko denbora nahikoa izan dezaten.
Eusko Jaurlaritzak eskaera aztertzeko konpromisoa hartu zuen, eta eskaintza publikoa 2017an egiteko asmoa berretsi du gaur, baina Lanbide Heziketako lanpostuak 2018an eskaintzea erabaki du, “behin plaza horien ezaugarriak, batik bat hizkuntza profilei dagozkienak, sindikatuekin aztertuta”.
Hezkuntza Saila lan eskaintza atzeratzearen aurkako da, “irakasleei eta hezkuntza sistemari ahalik eta egonkortasun handiagoa emateko, irakaskuntzaren kalitatearen mesedetan”.
Plaza kopuruari dagokionez, Hezkuntza Sailak azaldu du Espainiako legediak baimentzen duen lanpostu kopuru handiena eskainiko duela, nahiz eta “hobe zatekeen horrelako mugarik ez egotea”.