Gizartea -

Greziatik Bulgariara

Milaka errefuxiatu harrapatuta kanpalekuetan, zero azpiko tenperaturan

Hainbat pertsona hil dira dagoeneko hipotermiak jota Serbia eta Bulgariako mugetan, Mugarik Gabeko Medikuek salatu dutenez. Zero azpiko 20 gradurainoko tenperaturak neurtu dituzte.

Greziako kanpaleku baten irudia. Argazkia: EFE
Greziako kanpaleku baten irudia. Argazkia: EFE
Errefuxiatuak, hotzaren gatibu

1:20

agentziak | eredakzioa

Whatsapp Facebook Twitter Telegram Email

Mugarik Gabeko Medikuak erakundeak salatu duenez, milaka etorkin eta errefuxiatu harrapatuta daude Grezia eta Balkanetan, zero azpiko tenperaturekin, hotzari aurre egiteko prestatuta ez dauden kanpalekuetan.

"EBko herrialdeetako politiken arduragabekeria zinikoak, Siberiako hotzari eta neguari aurre egiteko prestakuntzarik ezarekin batera, okertu egin du Europan babes bila dauden milaka gizon, emakume eta umerentzat berez jasanezina zen egoera", esan du gobernuz kanpoko erakundeak Suitzan zabaldutako ohar baten bidez.

Egoera kezkagarria da, bereziki uharte greziarretan aurrera egin ezinik jarraitzen dutenentzat, kanpadenda gainpopulatuetan bizi direlako, eta Belgradeko eraikin abandonatuetan bizi zein Balkanetako muga zeharkatzen saiatzen ari direnentzat, horren arabera.

"Mugarik Gabeko Medikuak erakundeak behin baino gehiagotan eskatu die Greziako eta Balkanetako agintariei horien egoera egokitzeko, neguari begira", horren esanetan.

Gobernuz kanpoko erakundeak gaineratu duenez, 7.500 pertsona baino gehiago harrapatuta daude Serbian, gainpopulatutako kanpalekuetan eta behin-behineko instalazioetan.

Serbiak 6.000 errefuxiatu babesteko konpromisoa hartu zuen EBrekin, baina soilik 3.140 bizi dira neguari aurre egiteko egokitutako instalazioetan.

Belgraden, Afganistango, Pakistango, Irakeko eta Siriako 2.000 gaztek "hiriko erdiguneko eraikin abandonatuetan" lo egiten dute, zeroz azpiko 20 graduko tenperatura dutela.

Azken hilabeteotan, erakundearen arabera, Serbiak modu "larrian" mugatu du babes humanitarioa eta burusiak eta oinarrizko elikagaiak baino ez ditu banatzen.

Erakundeak berak larrialdiko berogailuak instalatu ditu, eta Serbiako agintariekin negoziatzen ari da babesteko gaitasuna zabaltzeko.

"Hainbat lagun hil dira dagoeneko hipotermiak jota Serbia eta Bulgariako mugetan, eta ezin gara besoak uztarturik egon", erantsi du.

Greziari dagokionez, erakundeak dio "milaka" pertsonak gainezka egin duten kanpalekuetan daudela eta zero azpiko tenperaturei aurre egin behar dietela.

"Sumingarria da ikustea, egindako iragarpenen eta agindutakoaren ostean, gizonek, emakumeek eta umeek kanpalekuetan jarraitzea, hotz-boladan", salatu du.

"Greziako agintariei eta EBri berehala larrialdiko neurriak har ditzaten eskatzen diegu, errefuxiatu zein etorkin guztiek babes duina eta bizi-baldintza egokiak izan ditzaten", azpimarratu du Mugarik Gabeko Medikuak erakundeak.

Hau zure interesekoa bada, baliteke beste gai hauek ere izatea
Zer ari da gertatzen Europan? Grezia Gaurko azken ordukoa Siriar errefuxiatuak Europan Errefuxiatuak azken ordukoa Zer berri dago Bulgarian? Hotz boladak Gobernuz Kanpoko Erakundeak Serbia albisteak