Gizartea -
Bizkaia
Zubi Esekiak irisgarritasuna bermatu dezan eskatu dute
Ehun lagun baino gehiago bildu dira Getxon, FEKOOR erakundeak deitu duen elkarretaratzean. Zubiak eskaintzen dituen zerbitzuak pertsona guztien esku jar ditzaten eskatu dute.
Agentziak | Erredakzioa
Zubi Esekiak pertsona guztien irisgarritasuna bermatu ditzan neurriak hartzeko eskatu du asteazken honetan Gutxitasun Fisikoa edo Organikoa duten Bizkaiko pertsonen Federazioak (FEKOOR, gaztelerazko sigletan).
Ehun lagun baino gehiago bildu dira Getxon, FEKOOR erakundeak deitu duen elkarretaratzean. Areeta eta Portugalete batzen dituen zubiak eskaintzen dituen zerbitzuak pertsona guztien esku jar ditzaten eskatu dute.
FEKOOR elkarteak ohar baten bidez jakinarazi duenez, haurrentzako gurditxoa daramatzaten familiek, adineko pertsonek eta gutxitasun fisikoa edo organikoa duten pertsonek zailtasun ugari aurkitzen dituzte Zubi Esekira sartzeko. Gainera, Bizkaiko Zubiko pasabidera ezin direla igaro salatu dute.
Ildo horretatik, beste irregulartasun batzuk salatu dituzte FEKOOR elkarteko kideek: txartela pasatzeko makinara heltzeko irisgarritasun falta eta zaharkituta geratu den seinaleztapena, besteak beste.
"Puente Colgante-Patrimonio de la humanidad ¿de toda?" lelopean, indarrean dagoen araudia ez duela errespetatzen azpimarratu dute. Arrazoi horregatik, pertsona guztien irisgarritasuna bermatu ditzaten eskatu dute.