Gizartea -
GETXO
Neska baten gorpua aurkitu dute Galea inguruko itsaslabarrean
Ertzaintzak baieztatu duenez, gorpua identifikatu dute, eta larunbat gauetik desagertuta zegoen neskarena da.
EITB.EUS
Getxoko Galea lurmuturraren inguruan igande honetan aurkitutako hilotza larunbatean desagertuta zegoen 14 urteko neskarena da, Ertzaintzak baieztatu duenez.
Ertzaintza bere bila zebilen larunbatetik, gaztea etxera itzuli ez zela ikusita, gauerdian haren gurasoek salaketa jarri ondoren. Hori dela eta, Ertzaintzaren bilaketa taldea lanean aritu zen gau osoan, eta goizean helikoptero batekin hasi ziren ingurua miatzen. Gurutze Gorriko eta Itsas Salbamenduko kideak ere batu ziren bilaketa lanetara.
09:00ak inguruan aurkitu zuten gorpua, itsasotik oso gertu, Galean. Handik gutxira, hilotza identifikatu, eta desagertutako neskarena dela baieztatu zuten.
Dirudienez, lehen ikerketen arabera, gorpuak ez ditu indarkeria zantzurik. Dena dela, autopsia egingo diote, heriotzaren nondik norakoak argitzeko.
Alkatearen dolumin-mezua
Imanol landa Getxoko alkateak doluminak adierazi zizkien hildako neskaren senitartekoei.
Ohar baten bidez, Landak bere babesa adierazi zion familiari "une latz hauetan", eta Getxoko bizilagun ororen elkartasuna igorri zien.
Landak hedabideei eskatu zien familiaren intimitatea eta mina errespeta dezatela. Gainera, Algorta auzoko jai-batzordeak iganderako antolatuta zituen inauteri-ekitaldiak bertan behera uztea erabaki zuen dolu gisa.