Gizartea -
Matxismoa
Erakundeek galarazi egin dute Gasteizko pub bateko ipurdi lehiaketa
Emakume ipurdi onena saritu nahi zuen Perseus dantzalekuak, baina antolatzaileek bertan behera utzi behar izan dute.
AGENTZIAK | ERREDAKZIOA
Larunbatean Gasteizko dantzaleku batean egitekoa zen emakume ipurdi lehiaketa bertan behera utzi dute antolatzaileek, Emakundek baieztatu duenez, erakundeek egindako presioaren ondorioz. Udalak ez du erabaki horren berri, eta, horregatik, ekitaldia debekatzeko asmoari eutsi dio.
"Miss colita sexy" izeneko lehiaketa Perseus pubak egin nahi zuen, eta 200 euroko saria eman nahi zion irabazleari, baina ekimenak hautsak harrotu ditu eta azkenean bertan behera utzi behar izan dute.
Lehiaketaren berri izan eta gero, Ekamunde eta Gasteizko Udala horren kontra egin dezaketen aztertzen hasi dira.
Udalaren esanetan, ekimena "gaitzesgarria" da, eta Gorka Urtaran alkateak adierazi du "matxista" dela eta emakumeak "gauza bihurtzen" dituela.
Gainera, ekimenak ikuskizunen legearen 6. artikulua urratzen duela uste du Udalak, hau da, sexismoa sustatzen duten eta giza duintasunaren aurkakoak diren ekimenak debekatzen dituena.