Gizartea -
Industria eta kutsadura
Petronorrek barkamena eskatu du sufre dioxidoaren immisioengatik
Findegiak azaldu duenez, sufrea berreskuratzeko lantegian izandako ezegonkortasunen ondorioz gertatu zen.
AGENTZIAK | ERREDAKZIOA
Petronorrek barkamena eskatu du igandean izandako sufre dioxido immisio altuengatik. Findegiak azaldu duenez, sufrea berreskuratzeko lantegian izandako ezegonkortasunen ondorioz gertatu zen.
Igandean bertan gertakariaren berri eman zien konpainiak Eusko Jaurlaritzako Ingurumen Sailburuordetzako Ikuskaritza Zerbitzuari eta herri agintariei.
Dagokion ikerketak egin ondoren, datu ofiziala jakinarazi zion Petronorrek Ingurumen Sailburuordetzari. Uneren batean San Juliango etxolan neurtutako immisioak 358 mikrogramo/nm3 bezainbestekoak izan ziren, legeak ezarritako 350 mikrogramoko mugaren gainetik.
Petronorren esanetan, muga gainditu izanak ez du esan nahi araua urratu duenik; izan ere, legeak urtean 24 aldiz eta behin-behinean muga gainditzea ahalbidetzen du. Hala eta guztiz ere, egindako akatsa aitortu eta barkamena eskatu du.
