Gizartea -
Onkologia Interbentzionista
Minbiziaren aurkako teknika aurreratuenetarikoak hizpide Bilboko Kongresuan
Azalaren bidez sendagai edo terapiak sartzeko teknika interbentzionistak erabiltzen dituen "diziplina anitzeko esku-hartzeaz" ere arituko dira.
AGENTZIAK | ERREDAKZIOA
Gaixo onkologikoak artatzeko teknika aurreratuenetarikoak izango dituzte hizpide asteazkenera arte Bilbon egingo den ECIO (European Conference of Interventional Oncology) biltzarrean.
Nafarroako Unibertsitateko Klinikako Erradiologia Baskularra eta Interbentzionista Unitateko arduradun eta kongresu honetako tokiko presidente den Jose Ignacio Bilbaok azpimarratu duenez, garrantzitsua da kongresu hau lehen aldiz Espainian egitea.
Jardunaldi hauetan, minbizia duten gaixoak artatzeko "diziplina anitzeko esku-hartzeaz" arituko dira. Horien artean, teknika interbentzionistak daude, sendagai edo terapiak azalaren bidez sartzen dituztenak. Puntzioen edo arterien bidez heltzen dira tumorera, tumore horiek elikatzen dituzten odol-hodietan tutuak sartuta. Tutu horien barruan sartzen dira sendagaiak.
Tratamendu konbinatuak ere aztertuko dituzte, immunoterapia eta teknika interbentzionistak baliatzen dituztenak. Horren bidez, gaixoaren sistema immunologikoa aktibatzen dituzten substantziak sartzen dituzte horren organismoan.
Erradiologia interbentzionistaren alorrean adituak diren Europa osoko 1.500 profesional batuko dira kongresuan, eta Bilbokoa irailean Kopenhagen egingo duten kongresu erraldoiaren atarikoa izango da.
Euskadiko barne produktu gordinean 2.854.000 euroko inpaktu ekonomikoa izango du Bizkaiko hiriburuan hiru egunez egingo duten kongresu honek.
