Gizartea -
Sutea
Beste hiru edukiontzi erre dituzte Bilbon
Atzo, beste bi erre zituzten. Beraz, azken asteotan, dagoeneko 20 edukiontzi baino gehiago kiskali dituzte.
Agentziak | Erredakzioa
Hiru zabor edukiontzi erre dituzte bart Bilbon. Suteak inguruan aparkatuta zeuden hiru ibilgailu arin kaltetu ditu, baita zahar-etxe bateko bi leiho ere, Segurtasun Sailak aditzera eman duenez.
Gertaera gauerdia baino minutu batzuk lehenago gertatu da Zorrozgoiti kalean, Zorroza auzoan. Edukiontzi bat erre da, eta, ondoren, beste bi edukiontzik ere su hartu dute.
Horrez gain, beroaren ondorioz, edukiontzien ondoan aparkatuta zeuden hiru ibilgailu kaltetu dira, baita zahar-etxe bateko bi leiho ere.
Suhiltzaileek sutea itzali dute, eta Ertzaintza gertatutakoa ikertzen ari da, Segurtasun Sailaren arabera.
Larunbatean beste bi edukiontzi erre zituzten Bilbon. Guztira, 20 edukiontzi baino gehiago erre dituzte azken asteotan.