Gizartea -
Emakumeen aurkako indarkeria
Aske utzi dute Donostiako ustezko sexu-erasotzailea
Neska gazte bat etxeko atarian sartu zenean gizona oldartu egin zitzaion, eutsi eta bultzaka eraman zuen arropa kendu nahian. Emakumeak ihes egitea lortu zuen, eta gizona segituan atxilotu zuten.
agentziak | erredakzioa
Donostiako epaitegi batek aske utzi du 22 urteko gizonezko bat, aurreko larunbatean hirian sexu-eraso saiakera bat leporatuta atxilotu ostean.
Larunbateko goizaldean izan zen sexu-erasoa, hiriko Parte Zaharreko etxe batean. Neska gazte bat eteko atarian sartu zen, eta atzetik zeraman gizona sartu zen berekin batera eta oldartu egin zitzaion.
Erasotzaileak emakumea heldu eta paretaren kontra eraman zuen, arropa kentzeko asmoz. Gazteak, hala ere, erasotik ihes egitea lortu zuen eta laguntza eskatu zuen oihuka. Orduan, erasotzaileak alde egin zuen. Emakumeak segituan deitu zion Ertzaintzari, eta agenteek minutu gutxira atxilotu zuten gizona, erasoa gertatu zen lekutik gertu.
Gaur goizean, auzia daraman epaileak libre utzi du ustezko sexu-erasotzailea.
_________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
