EH Bilduk irregulartasunak ukatu ditu GHK-ko kudeatzaile ohien lanetan

2011-2015 urteetan Gipuzkoako gobernu kontseiluko parte ziren EH Bilduko diputatu ohiek irregulartasunak ukatu dituzte zaborren kontsortzioen (GHK) aurreko kudeatzaileen lanetan, eta EAJri eta PSEri "zikin jokatzea" leporatu diete.

Martin Garitano ahaldun nagusi ohia buru izanda, denek agerraldia egin dute igande honetan, Donostian, Gipuzkoako Hondakinen Kudeaketak (GHK) aurreko talde kudeatzailearen aurka hasitako ekintzei buruzko balorazioa emateko.

GHK-k duela egun batzuk salaketa bat jarriko zuela iragarri zuen, Ainhoa Intxaurrandieta eta Iñaki Errazkinen aurka. Intxaurrandieta lurraldeko zaborrak kudeatzeko erakundearen buru izan zen aurreko legealdian, eta Errazkin Gipuzkoako Ingurumen zinegotzia eta GHKko administrazio kontseiluko burua. 41 milioi euro itzultzea eskatuko die, erraustegiaren aurreko proiektua geldiarazteak ekarritako kalte-ordainagatik.

Horren haritik, 2011 eta 2015 urteen artean Gipuzkoako gobernu kontseilua osatu zuten diputatuek "herritarren mandatuagatik" erraustegia geldiarazi zutenen aurkako akzio judizialak salatu dituzte, eta EAJri eta PSEri "linea gorriak pasatzea eta zikin jokatzea" leporatu diete.

2011ko foru eta udal hauteskundeetan Bilduk "hainbat udaletxetan gehiengoa" lortu zuela gogorarazi ostean, "baita Gipuzkoako Foru Aldundiko gobernuan ere", Garitanok honako hitzok esan ditu: "mandatu argia eman zitzaigun: erraustegia geldiaraztea, eta zaborrak kudeatzeko alternatiba bat aurkeztea".