Gizartea -
Metro Bilbao
Bi pertsona hil dira gaur goizean Bilboko metroan
Deustuko eta Areetako geltokietan izan dira ezbeharrak, eta atzerapenak eragin dituzte. 12:00ak aldera berreskuratu du metroak ohiko martxa.
eitb.eus
Bi pertsona hil dira astearte honetan Bilboko metroan. Lehenak, gizon batek, konortea galdu du Deustuko geltokira iristen ari zen metro batean; eta bigarrena, emakume bat, Areetako geltokian trenak harrapatuta hil da.
Metro Bilbaok jakinarazi duenez, Deustun hildako gizona bihotzekoak emanda hil da. Ezbeharra 09:45 aldera gertatu da. SOS Deiak zerbitzuko osasun-langileak bertaratu dira, baina ezin izan dute ezer egin hura suspertzeko.
Kasu horretan, metroaren zerbitzuak zazpi minutuan hasi da berriro martxan, konpainiaren arabera.
Emakumea, berriz, 10:45 aldera hil da Areetako geltokian metroak harrapatuta. Bigarren ezbehar horren nondik norakoak argitzeko daude oraindik.
Ezbehar horren ondorioz, atzerapenak izan dira Areetan trenek trenbide bakarretik ibili behar izan dutelako. 12:00ak aldera berreskuratu du metroak ohiko martxa.