90 urteko gizon bat hil da Iruñean, mozkor zihoan gidari batek harrapatuta

90 urteko gizon bat hil da bart Nafarroako Ospitalean, mozkor zihoan gidari batek harrapatu eta larri zauritu ostean, Iruñeko Udaltzaingoak ohar batean jakinarazi duenez. Baimendutako alkohol tasa laukoiztu zuen gidariak.

Ezbeharra bart jazo da, 20:10ean, Mendigorria kalean, Txantrea auzoan. Oinezkoa larri eraman dute Nafarroako Ospitalera, eta bertan hil da ordu batzuk geroago.

Gidariari alkoholemia proba egin diote, eta baimendutako tasa halako lau eman du. Hala, zuhurtziagabekeria larriaz gain, alkoholaren eraginpean gidatzea ere leporatu diote.

Udaltzaingoak ikerketa abiatu du gertatutakoa argitzeko.