Auto-ilara luzeak izan dira Gasteizen, Irunen eta Kantabriarako noranzkoan

Gasteizko saihesbidean, Biriatun eta Katanbriarako noranzkoan sei, zortzi eta bederatzi kilometroko auto-ilarak izan dira arratsalde honetan, hurrenez hurren, Aste Santuko oporretako irteera-operazioaren lehen egunean.

Ertzaintzak jakinarazi duenez, Gasteizen, A-1ean, Madrilerako noranzkoan, hiru istripu izan dira eta, horren ondorioz, sei kilometroko pilaketak sortu dira.

Irunen, AP-8 autobidean, Baionako noranzkoan, ez da ezbeharrik izan, baina ibilgailu ugari pilatu dira eta zortzi kilometroko ilarak sortu dira.

AP-8 autobidean, Muskizen, Kantabriarako noranzkoan, berriz, bederatzi kilometroko auto-pilaketak izan dira. Arratsaldeko 19:00ak aldera izan den istripu batek eragin ditu ilarak.