Mundua -
El Salvadorren
Oscar Arnulfo Romero monsinorea dohatsu izendatu du Vatikanoak
300.000 lagun inguru zeremoniaren lekuko izan dira San Salvadorren. Martiri sansalvadortarrak bakearen eta justiziaren alde lan egin zuen, eta tiroz hil zuten 1980. urtean.
AGENTZIAK | ERREDAKZIOA
Oscar Arnulfo Romero monsinore sansalvadortarra dohatsu izendatu du larunbat arratsaldean Vatikanoak bakearen eta justiziaren alde egiteagatik. San Salvadorren egin den ekitaldian 300.000 herritar inguru elkartu dira.
Angelo Amato Frantzisko aita santuak bidalitako kardinalak intsentsua eman die Romerok hil zuten egunean jantzita zeukan alkandorari eta martirien garaipenaren ikurra den palmondoari.
Mundu osoko hainbat ordezkari izan dira beatifikazio ekitaldian; besteak beste, Rafael Correa Ekuadorreko presidentea, Juan Orlando Hernandez Honduraseko presidentea, Juan Carlos Varela Panamako presidentea, Salvador Sanchez Ceren Salvadorreko presidentea, Miguel Diaz-Canel Bermudez Kubako presidenteordea, Helios Fallas Costa Ricako presidenteordea, Gaspar Vega Beliceko lehen ministro ordea eta Mexiko, Brasil, Kolonbia, Txile, AEB, Italia eta Nikaragua herrialdeetako ordezkariak.
Behartsuen alde lan egin zuen Romero monsinoreak, eta Armadak egindako krimenak salatu zituen. Heriotzaren eskuadroiek tiroz hil zuten 1980. urtean, San Salvadorreko Probidentzia Jainkotiarreko ospitaleko kapera batean meza ematen ari zela.
El Salvadorreko gerra zibilean (1980-1992) izandako krimenak ikertu zituen Egiaren Batzordeak, eta horrek ondorioztatu zuenez, Aliantza Errepublikano Nazionalistaren lider eskuindar Roberto D'Aubuissonek "lotura argia" izan zuen monsinorearen hilketarekin.
Bake-Akordioak hitzartu eta urtebetera, amnistia legea onartu zuten herrialdean, eta horrek Romeroren hilketa erantzulerik gabe utzi zuen.