Mundua -
Siria
'John jihadista'ren heriotza baieztatu du Estatu Islamikoak
Azaroan drone batekin egindako eraso batean hil zutela iragarri zuten AEBk, baina konfirmatzeke zegoen.
Agentziak | Erredakzioa
Mohamed Emwazi, 'John jihadista' ezizenez ezaguna, AEBk drone bidez egindako eraso batean hil zutela aitortu berri du Estatu Islamikoak (EI). Azaroan iragarri zuen bere heriotza Pentagonoak, baina orain arte, baieztatu gabe zegoen. Mendebaldeko hainbat pertsona bahitzea eta hiltzea egotzi zioten 'John jihadistari', Estatu Islamikoaren hainbat bideotan ageri baitzen.
Ingelesez kaleratzen duten Dabiq aldizkarian egin du iragarpena Daeshek. Onartu duenez, azaroaren 12an Raqqa hirian (Siria iparraldea) egindako eraso batean hil zuten AEBk.
Azaroaren 13an Emwazi hil zutela iragarri zuen AEBko gobernuak. "Goiz da esateko. Nahiko ziur gaude, eta denbora beharko dugu operazioa arrakastatsua izan ote den esateko", adierazi zuen orduko hartan Steven Warren Pentagonoak Iraken duen bozeramaileak.
Kuwaiten jaio zen, 1988an, baina, sei urte zituela, Erresuma Batura joan zen familiarekin bizitzera, eta Londres iparraldean bizi izan zen. Informatika ikasketak egin zituen Westminsterko Unibertsitatean.
2014an agertu zen lehendabizi Estatu Islamikoaren bideo batean. James Foley estatubatuarraren eta Kenji Goto japoniarraren hiltzailea izan zela uste da. Bi kazetarioi lepoa nola mozten zieten erakutsi zuen EIk bideo baten bidez.