Mundua -
Azken agurra
Fidel Castroren errautsak Kubako Santiagora iritsi dira
Kubako Santiagoko milaka biztanlek egin diote ongietorria agintari kubatarraren errautsei, txalo eginez, bandera kubatarrak eta Castroren argazkiak aldean zeramatzatela.
Agentziak | Erredakzioa
Fidel Castroren errautsak larunbat honetan iritsi dira Kubako Santiagora. Han lurperatuko dute bihar, eta herritarrek agur esan ahal izango diote agintari ohiari ekitaldi jendetsu batean.
Errepide nagusiko bi aldeetan, Santiagoko milaka biztanlek egin diote ongietorria errautsak zekartzan ibilgailuari. Txalo-zaparradak, Kubako banderak eta Castroren argazkiak izan dira nagusi. Irudi bera ikusi ahal izan da lau egunetan uharte osoan barrena egindako ibilbidean.
Presidente ohiaren errautsak zeramatzan segizioa joan den azaroaren 30ean abiatu zen Habanatik, eta mila kilometro baino gehiago egin ditu "Askatasunaren Karabana"k 1959an egindako bidearen kontrako noranzkoan. Izan ere, urte hartan, iraultza kubatarra irabazi berri zuten "bizardunek" Kubako Santiagotik Habanarako bidea egin zuten.
