Mundua -
Protestak
Gutxienez hiru lagun hil dira Venezuelan, Gobernuaren aurkako protestetan
Hala eta guztiz ere, MUD oposizioko koalizioak manifestazio gehiago antolatu ditu apirilaren 19a arte. Azken egun horretan "protesta nazional handia" egin nahi dute.
agentziak | erredakzioa
Gutxienez hiru lagun hil dira Venezuelan MUD oposizioko koalizioak Gobernuaren aurka antolatu dituen protestetan. Halere, manifestazioek aurrera jarraituko dutela jakinarazi dute.
Venezuelako Ministerio Publikoak baieztatu duenez, 36 urteko gizon bat eta 13 urteko mutiko bat hil ziren asteartean izandako manifestazioetan, Lara estatuan, baina ez dute informazio gehiagorik eman ikertzen hasiak diren gertakari horien inguruan.
Aurretik, Ministerio Publikoak jakinarazi du beste gazte bat hil zela Carabobon izandako protesta batzuetan.
Hala eta guztiz ere, MUDek manifestazio gehiago antolatu ditu apirilaren 19a arte. Azken egun horretan "protesta nazional handia" egin nahi dute, Auzitegi Goreneko zazpi epaileren kontra presioa egiten jarraitzeko.
