Jesus Torquemada
Analisia
Frantzia, hiru koloretako herrialdea
Jesus Torquemada
Frantziako departamenduetako bozketetan argi dago nork irabazi duen eta nork galdu duen. Alderdi Sozialistak galdu du eta oso bide arriskutsua hasi du.
Hauteskunde bateko emaitzak, gutxitan izan dira oraingoan bezain argiak. Frantziako departamenduetako bozketetan argi dago nork irabazi duen eta nork galdu duen. Alderdi Sozialistak galdu du eta oso bide arriskutsua hasi du. Greziako PASOK alderdiari gertatu zaiona gerta dakioke berari: bost urtetan, boterean egotetik kasik Parlamentutik kanpo gelditzera pasa zen PASOK. Izan ere, Frantzian izan diren azken lau hauteskundeetan, Alderdi Sozialistak behera egin du etengabe eta oraindik ez du hondoa jo.
Garaipena lortu du, jakina, Sarkozy presidente ohiaren inguruan eratu den eskuin tradizionalak, eta 2017ko presidentetzarako hauteskundeetan aurkezteko asmoa berrindartu du. Frantziako departamenduetako bi herenetan aginduko du, baina, presidentea izendatzeko bozketarako oraindik denbora falta da eta ezin du, oraindik, garaipena aldarrikatu.
Fronte Nazionalak ere irabazi du baina, ez dio askorako balio. Ez du inongo departamendutan aginduko baina, bigarren indar izan da kantonamendu askotan; 100 kontseilari lortu ditu eta Europako hauteskundeetan gertatu zen moduan, botoen ehuneko 20 gainditu du. Horrek esan nahi du 5 frantsesetik batek uste duela, Fronte Nazionala, beste alderdiak bezain bidezkoa dela. Frantzia jada, hiru alderdiren herrialdea da.
