Barrena: 'Ez dute nahi gatazka amaitzea, horri esker aberastu baitira'

Sortuko buruzagi Pernando Barrenak larunbat honetan salatu duenez, "hainbatek ez dute nahi gatazka politikoa amaitzea, eskubeteka lapurtu dutelako, aberastu direlako eta terrorismoaren aurkako borrokaren kontura bizi egin dutelako".

"Tortura. Euskal Herriaren aurka Estatuak erabilitako Tresna" izenburupeko ekitaldi batean izan da larunbat honetan Barrena, Basaurin.

Sortuko buruaren arabera, "torturak eta isiltasun politikoa eta mediatikoa inposatzen saiatu dira, eta horrek idatzi gabeko lege bezala funtzionatu du urteetan zehar".

Haren esanetan, "torturari babes politikoa eman dioten Estatu-itunak izan dira hemen (Moncloakoa, Ajuria-Eneakoa, esaterako), eta hitzarmen horietan PPk, PSOEk eta EAJk ere parte hartu dute".

"Aberastea nahi zutenek eta haren egoera babesteko terrorismoaren aurkako borroka aitzakitzat erabili zutenek euren artean babestu dira tortura-salaketaren bat agertu denean", nabarmendu du.

"ETAren aurkako borrokan azpijoko zikinen inguruan hitz egiten den une honetan, orain uler dezakegu zergatik hainbatek ez dute nahi gatazka politikoa amaitzea: eskubeteka lapurtu zutelako, eta diru horrekin hiriguneetan egoitzak ordaindu zituztelako, bataren eta besteren kontu korronteak handitzen zituztelako…", salatu du Barrenak.

"Espainiar Estatuaren ustez, Euskal Herria adingabe politikoa da, eta haren mesedetan gaude, eta hori berehala amaitu behar da, asimilazio hutsean erortzea nahi ez badugu", gaineratu du, "eta hona hemen gure aukera: herrialdearen demokratizaziorako bide propioa, independentziarako euskal bidea, herritarrok gure etorkizuna aukera dezagun".