Urkulluk 'planto' egin du Ertzaintzako sindikatuen jarreraren aurrean

Iñigo Urkullu kexu agertu da Ertzaintzaren sindikatuek berarekiko eta, batez ere, ordezkatzen duen instituzioarekiko erakutsitako "errespetu faltagatik". Azken aldian, Ertzaintzaren sindikatuek lehendakariak parte hartzen duen ekitaldietan protestak egin dituzte eta azken protesta horiek lehendakariaren pazientzia agortu ei dute. Are gehiago, gaineratu du ez duela bere jarreragatik barkamenik eskatuko Eusko Legebiltzarrean.

Lehendakariak ingurukoekin partekatu duen idatzi batean azaldu du haren haserrea, eta EFE albistea agentziak aipaturiko idatzia eskuratu du.

Urkulluk ziurtatu duenez, langileen aldarrikapenak (funtzionarioenak barne) errespetatzen ditu, baina adierazi du ezin duela onartu, aurpegia estalita, pankarta baten atzean ezkutatzen direnek bera grabatzea eta, gero, irudi horiek zabaltzea.

"Erakundearekiko hainbeste errespetu faltaren aurrean, planto egitea erabaki dut eta ez dut barkamenik eskatuko Legebiltzarrean", nabarmendu du.