Politika -
Udaleko kontuak
Gasteizko Udalaren defizita 39 milioi eurotan zenbatu du EH Bilduk
Urtaranek eskatutako txostenak 68 milioi euroko 'zuloa' utzi du agerian. Bestalde, epaiei dagozkien 15 milioiak defizit gisa ez zenbatzea eskatu du koalizioak eta bere gain hartzeko eskatu dio PPri.
AGENTZIAK | ERREDAKZIOA
Gasteizko Udaleko EH Bilduren udal taldeak adierazi du 39 milioi euroko zorra dagoela Udalean. Halaber, epaiei dagozkien 15 milioi euroak defizit gisa ez zenbatzea proposatu du EH Bilduk, are gehiago, Marotok eta PPk kudeaketan egindako "lardaskerien" ondorioak Alderdi Popularrak bere gain har ditzala eskatu du.
Udaletxean egindako prentsaurrekoan Miren Larrion EH Bilduren Gasteizko bozeramaileak adierazi du Udaleko kontu-hartzaileak eskainitako datu ekonomikoek arrazoia ematen diotela koalizioari.
"Aurreikusi gabeko 68 milioi euro ditugula baieztatu da eta horrek 39 euroko zuloa eragin du", deitoratu du. Gainera, epaiei dagozkien 15 milioi euroak zor gisara ez aitortzea proposatu du.
"Rajoyk epaiak ordaintzeko funtsa esleitu du duela gutxi. Maroto PPren zuzendaritzan eserita daukanez, erantzukizunez, eta Gasteiz gauza guztien gainetik baldin badago, egin dadila haren izurdearen lardaskerien kargu", adierazi du.
Bestalde, ohartarazi du maniobra horrekin eta PSE-EErekin laguntzarekin EAJ alfonbra gorria prestatzen ari dela murrizketak egiteko eta Jarduera Ekonomikoen gaineko Zerga murrizteko.
"39 milioi euroko zuloa izanda eta bankuei eta multinazionalei men egiteagatik, % 6a berreskuratzeko aukerari muzin egiten dio, hain zuzen ere, Gasteizen inbertitzeko balioko lukeena", kritikatu du.
Hori guztia dela eta, alkatearen agerraldia eskatu du Ogasun batzordean eta Urtarani eskatu dio haren "lehentasun ekonomikoen" artean gehitu ditzala lankidetzarako, berdintasunerako, euskararako eta elkarteentzako diru-partidak berreskuratzea.
