Larrion: 'Batzuk ez dira ohartu garai berri batean gaudela'

Gasteizko jaietan ETAren anagrama zuen bandera bat zintzilikatu dutela eta, "indarkeria guztiak onartezinak" direla nabarmendu du Miren Larrion EH Bilduk Gasteizko Udalean duen bozeramaileak. "Dirudienez, batzuk ez dira ohartu garai berri batean gaudela", erantsi du.

Covite terrorismoaren biktimen elkarteak atzo salatu zuenez, ETAren anagrama zuen bandera izan zen ikusgai hiriburuko txosnetan eta ezker abertzaleari leporatu zion jaiak erakunde armatua "omentzeko" erabili izana.

Larrionek azaldu duenez, ez zekien bandera hori zintzilikatuta egon zenik eta Gorka Urtaran alkatearen ahotik jakin zuen berria. Alkateak "onartezintzat" zuen gertatuta.

Koalizio abertzalearen bozeramailearen esanetan, indarkeria mota guztiak "onartezinak" dira, eta biktima guztiek gogoan hartzearen eta jasandako mina aitortzearen alde egin du.

Covitek egindako salaketen harira, honakoa esan du Larrionek: "Jaiak aldarrikapenerako erabil daitezke, gizartearen isla diren aldetik. Hori politika egitea bada, denok ari gara egiten", borobildu du.